Piztiak

1. Agur eman

Aitak bere buruaz beste egin zuenetik, Ekiñe ez da Lumazulo baserrira itzuli. Koadrilakoek inoiz ahaztuko ez duen agur-festa prestatu diote bertan; Albaren nebari ostutako LSD kartoitxoak protagonista. Ekiñeren izeba Karmenek (orain Lumazulo baserriaren jabeak) ohartarazi ditu: ezin dira ganbarara igo. Lagunak irrikan daude baserria ezagutzeko, Albaren amonak hainbat istorio kontatu dizkie baserrian harrapaturik utzi zuten arimari buruz. Gau dantzagarria berehala bihurtuko da amets gaizto, baserria, bere sekretuak argitara atera eta haien aurrean agerian jartzen hastearekin batera.

2. Txori handia kaiola txikia

Karmenek ezusteko bisita jasoko du gauerdian. Nora da, ahizpa txikia, sei urteren ostean bat-batean itzuli da baserrira; aurpegia ubelduz beterik. Norak berehala atzemango du Ekiñek topatutako kutxa zaharra eta Karmen egitera ausartu ez dena egingo du: kutxa ireki. Bi hatz daude kutxaren barruan. Noraren berragerpenak baserriaren kontakizunak agerian utziko ditu; Amak gauero Endika, Karmen eta Norari errepikatuak. Noraren bisitarekin batera etxeko izpirituaren presentzia handitzen joango da Lumazulon, Karmen oroitzapen guzti haiek saihesten saiatzen den bitartean. Baina Nora ez dator iraganeko kontuei buruz bakarrik hitz egitera, autoko maletategian zerbait dakar, lurperatu beharreko zerbait. Egin beharrak burututa Norak proposamen bat egingo dio Karmeni: erabili ditzala baserrian hartuko dituen bezeroak "etxeak dioena" deskubritzeko. Jokoan sartuko da pertsonaia berri bat ere: Kepa. Bajan dagoen ertzaina asaldatuta dator bart gauean Mercedesek ekarritako berriekin: Nora eta Karmen ikusi zituen gorpu bat lurperatzen.

3. Txerrikumea

Miren ustekabean topatu da ospearekin. Pertsonek arimarekin konektatzeko bide ezberdinak ikertzen pasa du bizitza, janari osasuntsua, naturaren zaintza eta beganismoa ditu ardatz nagusitzat, baina idatzi duen azken liburua ustekabean birala egin da. Ospe horren erdian, ustekabeko egoera bat gertatuko zaio: telebista kate txiki batean txerrikume bat prestatzen amaitu du, eta ondorioz jarraitzaile begano guztien hate jasaten ari da. Egoera jasanezina bilakatu den honetan, Alaiak bere errepresentanteak, baserri bat topatu du erretirorako. Miren indarberritzea da helburua, bueltan, oraindik ere ospetsuago egingo duen dokurrealitya grabatzeko.

4. Arima maitez mindua

Karmenek kutxa bere tokira itzuli du. Aurreko bezeroak esandakoari kasu egin gabe, berriz alokatuko du baserria. Oraingo honetan laukotea iritsiko da hiritik. Kristinak ez dio zentzurik topatzen bere bizitzari, gustuko ez duen bikotearekin, Iñigorekin, ama izateko akituta utzi duen bide medikalizatua hartu du. Honi susmo bat gehitzen zaio: Iñigo eta Malen, bere laguna, elkarrekin daude. Mirenek guztia agerian utzi nahi du eta Malen, Eneko (honen bikotekidea) eta Iñigo gonbidatu ditu mendian galduta dagoen baserrira. Gau horretan ez da agerian traizioa geratuko soilik. Mirenek zerbait ikusiko du hormetatik irteten.

5. Atso ipuinak

Kepa baserrian geratu da hormatik atera berri duten kutxa eskuan duela. Lau urte dira baserri barruan egon ez dela; Endikak bere buruaz beste egin zuenetik. Kutxa ikustatzen ari dela soinu arraroak entzungo ditu baserriaren kanpoan dagoen zuhaitzean eta Mercedesek kontatutakoa gogoratuko du: Nora eta Karmen gorpua lurperatzen. Une horretan irudia absurdoa egin zitzaion, hala ere ziur dago Karmen zerbait ezkutatzen dabilela eta zuhaitz azpian zuloa egiten hasiko da. Horrela topatuko du Karmenek. Beraien artean ezkutuko zerbait dagoela deskubrituko dugu eta Karmenek etsita, laguntza eskatuko dio. Bai eman ere, Kepak badaki nora jo: hezurretan aditua den gizon bat ekarriko du baserrira, Guillermo.

6. Piztiak

Garazik ez du berriz ama izan nahi; bi seme, baserri handi baten kudeaketa eta indarrean hartzen duen senarra ondoan izateari ez dio laugarren baten ardura gehitu nahi. Garazik ez du ama izan nahi; sekretupean gorde nahi du bekatua, Maurizia eta Luixari eskatuko die laguntza. Garazik ez du ama izan nahi eta hori ez da gauza erraza 1.623 an. Maurizia eta Luixarentzat isilpean, gaua lagun dutela lan egitea ohikoa da. Herriko emakumeen beharrizanak asetzen dituzte bi emaginek; gaur Garazi da, baina atzo Maria izan zen, eta bihar agian Juana izango da. Emaginek teilatupean gordetzen dituzte jaio nahi izan ez dutenak, lur sakratuaren faltan baserriak zaindu ditzan.