Nork Nori Noiz?

10. Jone Bengoa eta Mikel Aginagalde

Sortzaileak dira Jone eta Mikel. Jone Bengoa komikigintzan, stand up komedian eta gidoigintzan aritu da besteak beste, eta Mikel Aginagalde ilustratzaile eta tatuatzailea da. Sorkuntzaz, beraien ibilbideaz eta etorkizunaz hizketan jarri ditugu eta hori gutxi balitz Adimen Artifizial batekin lehian jarri ditugu marrazten.

9. Jone Otxoa eta Leire Etxebeste

Jone zein Leirek Enpresen Administrazioa eta Zuzendaritza ikasi zuten Deustuko Unibertsitatean, baina ordutik hona biek oso ibilbide ezberdinak hartu zituzten. Jone Otxoak ekonomia sozial eraldatzailearen bidea hartu zuen eta Koop57n dihardu lanean. Leire Etxebestek aldiz, hiru urte eman zituen New Yorken lanean eta orain gutxi itzuli da Euskal Herrira. Ekonomiaz, lanaz eta etorkizunaz jardun dute solasean.

8. Ane Galardi eta Bittor Kas

Sukaldaritza beti lotu izan da euskal nortasunarekin eta, biak ala biak, asko aldatzen ari dira azken urteetan. Ane Galardi zein Bittor Kas txikitatik aritu dira sukaldean eta horrek eraman zituen Basque Culinary Centerrera. Handik bakoitzak bere ibilbidea osatu du, baina, biek ala biek, jarraitzen dute sukaldean eta baita sareetan zein irratian euskarazko dibulgazio lana egiten. Sukaldaritzaz, tradizioaz, berrikuntzaz eta euskaraz komunikatzeaz jardun dute, besteak beste.

7. Maïmuna Fofana eta Josu Peréz

Maïmuna Fofana hamaika urte zituela etorri zen Malitik Euskal Herrira eta gaur egun ikerketan zein Errenteriako Harrera gunean ari da. Josu Perézen familiako kide batzuk, aldiz, orain hamarkadak iritsi ziren Euskal Herrira, maketoak ziren. Iosuk eta bere kuadrillako kide batzuk, beraien artean euskara gehiago egiteko asmoz Maketo Irratia sortu zuten. “Nork Nori Noiz?” podcastaren atal honetan migrazioak, hizkuntzak eta identitatea dira hizpide.

6. Onintza Enbeita eta Uxue Amonarriz

Zer datorkigu burura baserriaz hitz egitean? Zein antzekotasun dituzte Euskal Herriko kulturgintzak eta lehen sektoreak? Zein etorkizun? Plaza eta baratzea, larrea eta eszenatokia. Bikain ezagutzen dituzte biak “Nork Nori Noiz?” podcastaren 6. ataleko bi gonbidatuek, ez da hoberik aipatutako galderak erantzuteko.

5. Irene Arrarats eta Nerea Ibarzabal

Hizkuntza, euskara, lanabes dute Nereak eta Irenek. Nerea bertsolaria eta idazlea da, besteak beste, eta Irene aldiz Berria egunkariko euskara arduraduna da, baita Euskaltzaindiko euskaltzain osoa ere. Beraiekin euskararen etorkizunari argi egiten saiatu gara “Nork Nori Noiz?” podcastaren atal honetan.

4. Nagore Legarreta eta Aitzol Garcia-Etxarri

Artista da Nagore Legarreta, besteak beste, argazkilaria. Aitzol Garcia-Etxarri aldiz zientzialaria da, fisikaria. Bi mundu ezberdinetatik datozela esan daiteke, baina ondo begiratuta gauza asko dituzte komunean. Adibidez, biek dituzte lanabes argia eta esperimentazioa. Bi ikuspuntu hauek uztartuz begiratuko diogu etorkizunari.

3. Antton Telleria eta Olaia Inziarte

Euskal Herrian mota guztietako eszenatokiak zapaldu dituzten bi artista elkartu ditugu solasaldi honetan. Umorez eta konplizitatez bustitako solasaldian horixe izan dugu jomugan, besteak beste: zein eszenatoki beharko ditu euskarak etorkizunean?

2. Onintza Legorburu eta Oier Zuñiga

Denboraldiko bigarren atalean, Onintza Legorburu eta Oier Zuñiga izango ditugu bidelagun. Batetik, Onintza hizkuntza-ohiturak eta euskararen lekua aztertzen ari da espazio transfeminista informaletan; bestetik, Oier antzerkigilea eta sortzailea da, eta euskal kulturaren, identitatearen eta hizkuntzaren inguruko hainbat proiektutan aritu izan da. Euskarak XXI. mendea bizirauteko beharko dituen aliantzez, iruditegiez eta bizirauteko moduez aritu dira solasean “Nork Nori Noiz?” bideopodcastean.

1. Goiatz Oiartzabal eta Mikel Irizar

Elkarrizketa honekin abiatuko dugu “Nork Nori Noiz?” podcastaren bigarren denboraldia. Esparru oso desberdinetatik etorriak izan arren, Goiatzek eta Mikelek elkarrekin egin zuten Badalab hizkuntza-berrikuntzako laborategia sortzeko bidea. Gaur egun, Goiatzek urte batzuk daramatza Badalabeko zuzendari nagusi lanetan, eta Mikel, aldiz, erretiroa hartuta dago. Une egokia da Badalaben sorreraz, orainaz eta geroaz hausnartzeko.