Musiktruk

Jaietako soinu-bandak

Dantzarako musika

Jaietako soinu-bandak

Uda ate joka dugu, eta harekin batera iristen dira herriz herri ospatzen diren jaiak, kaleak musikaz, dantzaz eta giro paregabez betetzen dituztenak. Gaurko saioan, Judith Monteroren eskutik, jaietako soinu-bandaren ibilbide berezia egin dugu: San Joan zortzikoetatik hasi, musika banden eta bertsio sinfonikoen indarra entzun, txarangaren alaitasunaz gozatu, danborraden doinuekin hunkitu eta erraldoi zein piraten abestietara iritsi arte. Hernani, Tolosa, Donostia, Iruñea, Baiona eta Bilbo lotu dituen musika-bidaia udatiarra izan da, gure herrietako jaiak eta tradizioak omentzeko. Gora musika, gora uda eta, nola ez, gora herriko jaiak!

Urrezko instrumentua

Lisa Simpsonek bezala Judith Monterok ere txikitan saxofoia aukeratu zuen, baina zein faktorek eragiten dute musika instrumentuaren aukeraketan? Modako instrumentua ote da saxofoia? Tresnaren barietate gehiago ezagutu ditugu oraingo honetan Monteroren eskutik, tenorraren eta sopranoaren adibideak entzunaz, besteak beste. Musikaren hizkuntzan koloreez hitz egiten denean, zeri erreparatzen zaion ere galdetu diogu musikariari.

Saxofoiaren historia

1840ko hamarkadan asmatu zuen saxofoia Adolphe Sax-ek eta 1846an aurkeztu zuen patentea Parisen. Musika bandetan jotzen zen hasieran, banda militarretan ondoren eta orkestretan ere sartu zen, Jazzaren funtsezko musika tresna bihurtu arte. Hamaika bitxikeria ezagutu ditugu, tartean, Elise Hallen istorio harrigarria ere kontatu digulako Judith Monterok.

Dantzarako musika

"Entzuteko bakarrik" egiten den musika oso berria omen da, hori kontatu digu Judith Montero musikariak. Izan ere, dantza eta musika beti lotuta egoin dira. Dantzaren egunean, gure dantza saio propiorako doinu desberdinak proposatu dizkigu; errusiar dantzariak, euskal dantzak, salsa, jazza, balleterako urratsak...

Keinu musikala

"Bi punturen artean, zein da biderik laburrena? Biderik ederrena!", Joxean Artzeren hitzak bere egin ditu Judith Monterok arteaz, edertasunaz, eta musikaz aritzeko.

Martxoak 8 egunero da

“Feminista bat bere bizitzari buruzko egia kontatzen duen emakume oro da”, Virginia Woolf (1882-1941). Martxoak 8 egunero dela aldarrikatu du Judith Montero musikariak, Emakume sortzaileen lanak ekarri dizkigu, hausnarketa partekatuekin batera, bluesetik hasita euskal kantutegi klasikorainoko bidea eginez.

Entzun edo aditu

Judith Monterok entzumena zaintzearen garrantzia azpimarratu nahi izan du, zentzumena babesteko beharraz eta egungo bolumenen joeraz ere aritu da. Zer da entzutea? Zeri aditzen diogu? Zer eragiten du gugan musika bat ala beste entzuteak?

Inauteri doinuak

Judith Montero musikariarekin errepasoa egin dugu inauteri doinu klasikoenetatik hasita, berrienetaraino. Incansables entzunda txaranga giroan murgildu gara, Lantzen izan gara eta dantzatu dugu Godalet dantza. Konposatzaile klasikoak ezagutu ditugu eta egin dugu geldialdia Veneziako inauterietan zein Rio de Janeirokoan "Ó Abre Alas" Chiquinha Gonzagaren konposiziorik ezagunenaren eskutik. Euskal Herrira itzuli gara bueltan Ainara Ortegaren Euskara marabillosuarekin eta amaitzeko Molinatxo kantuaren bertsio ezberdinak entzuteko aukera izan dugu: Aldapeko Basque Latin Jazzen kantua, Et Incarnatusen habanera, Saxobietaren bertsioa edota Tolosako Dultzaineroek jotakoa entzuteko aukera izan dugu.

Reggeaz eta Bob Marleyz

Hauxe esan zuen behin reggaearen erregeak: “Musikak badu gauza oso on bat, benetan iristen zaizunean, arazo guztiak ahazten dituzu". Judith Montero musikariarekin Bob Marleyren doinu entzutetsuak errepasatu ditugu, 81 urte bete baitira musikari jamaikarra jaio zela. Artistaren bizitzaren errepasoa ere egin dugu, eta bere ibilbide oparoan inguruan izan dituen emakumeen garrantzia azpimarratu du Monterok. Gainera, bertsio berezi bat ere ezagutu dugu, oso gurea: Lekeitioko Musika Bandak 2010ean sortutako bertsioa, Jon Maia bertsotan, Amaia Uriberen aurkezpenarekin, Iñaki Urkizuren moldaketa izanik eta Urtzi Iriondo zuzendari lanetan.

Askatasuna musiktruk

Askatasunaren nazioarteko egunean Judith Montero musikariaren aurkezpena izan dugu Argi Ibilin. Artista hernaniarraren ibilbide pertsonala eta profesionala errepasatu dugu bere bizitzako soinu bandak entzun bitartean. Montero bi astetik behin izango da gurean, musikaz gehiago ikasteko.