Gladysen haritik

2. “Oztopoak ikusita, indar guztiak diseinu grafikoan jartzea erabaki nuen”

Sormena borborka izan du betidanik, eta osasun alorrean lan egiteko zailtasunak jartzen zizkiotela ikusita, indar guztia diseinu grafikora bideratzea erabaki zuen. Orain, webguneak diseinatzeko programazioan ere badihardu, adimen artifiziala diseinuan indartsu sartu dela jakitun. Aholkuak ere jaso ditu, aurkezlearen aldetik. Elene Mendizabalek, inprimagailua eguneratuta edukitzeak duen garrantziaz ohartarazi dio Maleni.

1. “Txikitan etxeko ordenagailua desmuntatu nuen”

Eire musika taldeko kidea izateagatik ezaguna, telekomunikazio ingeniaritza ikasi zuen eta gaur egun kriptografia kuantikoaren alorrean ikertzen eta doktorego tesia egiten ari da. Elene Mendizabal aurkezleak eta Eire Salegik gauza asko partekatzen dituzte: zumaiarrak dira eta solfeoa ikasi zuten.

0. Teaser. "Gladysen haritik"

“Gladysen haritik” bideopodcastak teknologiaren eta ingurune digitalaren esparruan ari diren emakumeak ekarriko ditu lehen planora, haien lana ez ezik, haien ibilbidea, jakin-minak, zaletasunak eta mundua ikusteko modua ezagutzeko. Elene Mendizabal informatikari eta eduki sortzaile zumaiarrak gidatuko ditu solasaldiak, aurkezpen formaletatik eta curriculum-zerrendetatik aldenduta. Gonbidatuek zer egiten duten jakiteko, baina batez ere nor diren, zerk mugiarazten dituen eta nola iritsi diren dauden lekura. "Gladysen haritik", EITB Audioren ekoizpen bat da, PuntuEus eta EHUko Informatika Fakultatearekin elkarlanean egina.