Dastattoo

D2: 1. Salegi. Tradizioa azalean

Bost belaunaldiren tradizioa darama aldean Tasio Fernandez-Quejo Altzibarrek. Aginowsky Itziarko Salegi jatetxera hurbildu da, lana eta familia banatzea zaila den sukaldera. Itziar, arrantzarako portutik urrunegi eta nekazaritzarako garaiegi omen dagoen herria da. Salegitarrek bertako produktoreekin egiten dute lan, sasoian sasoikoa platerera eramanez. Tasiok Mila aurkeztuko dio Aginowskyri, jatetxearekin aspalditik elkarlanean dabilen artzaina. Ondoren, osagai klasikoekin errezeta berezi bat prestatuko du sukaldariak. Bere amaren kalterako, hainbatetan tatuatu da Tasio. Oraingoan, errealismotik aldendu eta azalean molde tradizionala probatzeko ausardia pixka bat beharko du Itziarko gazteak. Bestalde, Aginowskyk bere estiloa mantentzearen edo traizionatzearen artean erabaki beharko da.

D2: 2. Baserriberri. Eguzki-mole bat plazan

Gaurko mokadua azkar jatekoa izango da, baina ez horregatik balio txikikoa. Baserriberri jatetxea ez da baserria eta ez da berria, Iruñeako Gaztelu plazatik hurbil kokatzen da. Luken Vigok sukaldaritza fusiboa eta sortzailea besterik ez du mahaigaineratzen. Pintxoetan espezializatu da Baserriberrin, baina barrura sartzean barran ez da inon pintxorik ageri: sukaldariek momentuan eta zuzenekoan egiten dute lan. Aginowsky jakin minetik hurbildu da hiri buruzagira. 'Katxibatxe' eta 'pitxipitxi' artean dabil, pintxo orijinalengatik txapeldunak izan diren jatetxean. Otazako upategi batera ere joango dira protagonistak, osagai sekretu baten jatorrira. Luken zapore esplosiboen bila jarriko da. Modu fusibo eta sortzaile berdinean erantzungo du Aginowskyk: koloretako arkatzekin diseinatutako tatuaje batekin. Ea nola konpontzen diren bi artistak.

D2: 3. Mendiola. Mikatzarekin gozoki jolasten

Saio honetan ez da jatetxerik azaltzen, baina izarretako menua prestatu du Bittor Kasek. Eskoriatzako tontor ederrenetako batetik behera, Mendiola auzoan, lagun arteko elkartean elkartzen dira Bittor eta Gari anaiak. Tiktokerako bideoak prestatzen dituzte errezeta eta efektu originalekin. Horrela heldu da Aginowsky bi artista hauengana. Tiktoken azaltzea nahikoa ez eta korta batera eramango du Bittorrek Mikel: Ardiak udarako prestatzen ditu MIkelek, behar bezala ilea moztuz. Aginowsky ere animatuko da ile apainketetara eta hurbilagotik ezagutuko du lanbidea. Familia guztiarekin batuko dira dastaketarako, ondoren, bizitakoan oinarritutako diseinua egingo du Aginowskyk bi anaientzat.

D2. 4. Labe. Minimalismoa sutan

Igogailuan gora egin du Aginowskyk, Egia auzoan, Labe jatetxeraino. Mikel XXXrekin elkartu da, laborategia eta sukaldea batzera ohitu den gaztearekin. Lekunberriraino jaitsiko dira bi protagonistak, zerri artera. Desagertzear egon da euskal txerriaren arraza, basogabetzeen eta gaztainondoen urritzearen ondorioz. Baina ekoizle nafar batzuen apustuarekin batera hazi da berriz ere zerrien familia. Donostiara bueltan, izenkideek Tabakalerako beirazko ganbaran egingo dute dastaketa. Gaztaina saltsaren zapore gozoarekin liluratuko da Aginowsky. Dena ondo zihoan, baina bi Mikelen estiloek ez dute bat egiten: Tatuatzaileak estilo tradizionala mantendu nahiko du, baina sukaldaria minimalismoarekin fidela da. Noren alde egingo du tintak?

D2: 5. Bideko. Bodegoi bat lore artean

Araba eta Bizkaia elkartzen diren bidean dago Bideko Jatetxea. Lore artetik agertu da Jon bat-batean eta baserria goitik behera erakutsi dio Aginowskyri. Izaskunen gaztandegira hurbildu dira, gazta egiteko prozesuan ezkutatzen diren sekretuak ezagutzera. Aginowsky gazta zalea da oso eta dastaketa momenturako espektatibak desitxuratu zaizkio: ez daki lehenengo plater bat, bigarrena edo postrea dastatuko duen. Baina esperotakotik urrun, Jonek goi mailako errezeta kozinatuko du, inguruko errekak eta lurrak platerean txukun aurkeztuz. Aginowskyk nahikoa lan izango du pareko inpresioa eragingo dion diseinua aurkezten.

D2: 6. K5. Kilimak ahoan eta azalean

Aiako mahasti artean kokatzen da K5 txakolinaren bodega. Bertan ezagutu dira Amaia Argiñano eta Aginowsky. Mahatsondoetatik eta ardoaren dastaketa momentura arteko bidea egin dute elkarrekin. Ondoren, mahatsaren lorearen usain gozoa probatzeko aukera izan du Mikelek Garirekin, eta lan pixka bat ere egin du. Amaia ezagutzen doa, bere dotorezia eta lerro finekin. Ez du erraz izango tintaz ziztatzearena. Gaurkoan, mahaiaren bueltan ez dago argi zerk laguntzen duen zer: txakolinak jatordua edo mokaduak edaria. Kilimak eta K5 ardoak probatu ditu Mikelek, bodegako botila izarrak. Ondoren, Amaiaren estilora hurbiltzeko saiakera egingo du. Helburu bakarra du: tinta isurtzea.

D2: 7. Paladar. Emozioen baratzean

Ibaizabal ibaiaren ezkerraldera heldu da Aginowsky patinetean. Bertan, Jasonek egiten du lan, El Paladar jatetxean. Gazte gaztea da Jasone, baina bizi grin handia du begietan. Ez da gogoratuko, baina Aginowskyrekin jada elkartuta zegoen aurretik ere, horrek, bien arteko harremana erraztuko du. Juleneren ortura hurbilduko dira, Gatikara. Bertan, sasoian sasoikoaren eta bertan bertakoaren aldeko aldarria egingo dute ozen denek. Ondoren, bertako tomatea erabiliko du Jasonek, Mikeli plater berezi bat prestatzeko. Osagaietan jarriko dute arreta Mikelek eta Jasonek haien proposamenetan.

D2: 8. Toloño. Gourmeta eta rocknrolla

Gasteizko Abastos Merkatuan taberna berri bat zabaldu berri dute: Toloño. Izen hori, ezaguna da hirian, traineru formako bere pintxoengatik batez ere. Aginowsky, Aitzol ezagutzera hurbilduko da, gasteiztarra jatetxea koordinatzen dabil. Azken saioa du Aginowskyk eta energia betean heldu da merkatura. Bertan, Toloñoren espazio ezberdinak ezagutu dituzte, barra klasikotik, gastrotekara eta sukalderaino. Aitzolek, tatuaje diseinu baten proposamena pentsatuta duela aitortuko dio Mikeli. Ondoren, Imanolekin elkartuko dira hegaluzea garbitu eta dotore aurkezteko. Aginowsky, Aitzolen errezeta ezin asmaturik ibiliko da. Azkenik, dastaketaren ondoren, buruan duen ideia botako dio sukaldariak tatuatzaileari. Honek bueltan, aukera bakarra egingo dio: dena ala ezer ez.