Basque

5. Itziar Ituño: Euskal kulturaren bozeramaile

Itziar Ituñok bazuen izena Euskal Herrian, baina "La Casa de Papel" telesailaren ostean mundura egin zuen jauzi. Netflixen estreinatu eta hiru egunetara, hiru milioi jarraitzailetaraino heldu zen Instagramen eta, azkenean, bost urtez luzatu zen bere Madrilgo abentura. Txikitan, aktore izan nahi zuela esan zuenean, barrez hasi zitzaizkion eskolako lagunak, oso lotsatia baitzen. Baina garbi zuen bere ametsa. Halere, ez zuen espero hainbesteko ospea lortuko zuenik. Hasiera batean ez zuen Madrilgo proiektuan parte hartzeko asmorik, eta sustoa hartu zuen bera hautatu zutela jakiterakoan, eroso bizi baitzen Euskal Herrian. Baina froga egitea erabaki zuen, eta, egun, telesailaren eztandari esker lortu duen oihartzuna baliatzen ari da euskal kultura eta hizkuntza aldarrikatu eta hedatzeko. "Basque" podcastaren atal honetan, bere ibilbideaz eta arteak aldaketarako tresna gisa duen funtzioaz hausnartu du aktoreak.

4. Hiromi Yoshida: Euskarak bizirauteko erronka

Euskal Herrian sekula izan gabe ikasi zuen euskara, duela hiru hamarkada, eta orduz geroztik maiz etorri da. Hiromi Yoshida hizkuntzalari eta euskara irakaslearekin elkartu gara Azpeitian, bereziki maite duen herrian. Izan ere, bertako euskalkiari buruz egin zuen tesia, eta japonierara itzuli zuen Bernart Etxepareren "Linguae Vasconum Primitiae" liburua, euskaraz idatzitako lehena. Euskalkiak eta gure hizkuntzaren dinamikotasuna nabarmentzen ditu Yoshidak, baina kezkatuta dago euskararen osasunarekin, ez baita erraza hizkuntza gutxituentzat mundu globalizatuan bizirautea. "Basque" podcastaren atal honetan, gertutik ezagutuko dugu ikertzaile japoniarraren ibilbidea, euskararekin maitemindu zenetik gaurdaino.

3. Sahatsa Jauregi: Artistak, desberdinaren ordezkari

Sahatsa Jauregiren esanetan, “Euskal Herriko arte testuinguruak badu berezitasun bat, leku oso gutxitan gertatzen dena: artista pila bat daude eta oso kalitate handiko gauzak egiten dira, baina galeria eta erakusketa espazioak murritzak dira”. Euskal arte garaikideko izen handietako bat da Sahatsa. Eskultore eta artista plastikoa da, eta irakasle eta ikerlari lanetan ere ari da Leioako Arte Ederren fakultatean. Nolakoa da galerien eta kolekzionisten mundua? Zein pertzepzio dute artistez klase altuko pertsonek? Jauregik Bilbon duen lantokiraino sartuko da Oier Aranzabal, eta solasean arituko dira artistaren jatorriaz eta orainaz, tradizioaz eta arte garaikideaz, besteak beste.

2. Eneko Atxa: Amonaren sukaldetik Michelin izarren konstelaziora

Haurtzaroko oroitzapen asko ditu Eneko Atxak sukaldearekin lotuta. Sukaldea etxeen bihotza zen garai batean; ikasteko eta istorioak entzuteko tokia. Hain zuzen ere, orduak eta orduak ematen zituen txikitan amaren eta amonaren kontuak entzuten, usain ederrez inguratuta. Izan ere, gastronomiak berebiziko garrantzia du euskal kulturan: “Euskal Herrian guztia mahaiaren inguruan gertatzen da; zerbait ia espirituala da”. Hala uste du chef zornotzarrak, hiru Michelin izardun Azurmendi jatetxe ospetsuaren arduradunak. Larrabetzukoaz gain, baditu jatetxe gehiago ere: Bilbon, Madrilen, Sevillan eta baita Tokion ere. Zein zapore eta kolore ditu Euskal Herriak? Nola lortu du Azurmendik horrenbesteko arrakasta? Eramangarria al zaio goi mailako jatetxe baten presioa? Urte asko igaro ditu Eneko Atxak pentsatzen zein ederra izango zen gailurrera iristea, eta behin helburua lortuta, aitortu du prozesuak asebete duela gehien. Orain, momentuaz gozatzearen alde dago.

1. Esti Urresola: Zinema deserosoaren boterea

2011n lana utzi eta Bartzelonara joatea erabaki zuen Estibaliz Urresolak, zinemagile bihurtzeko ametsaren atzetik. 13 urte geroago, bere lehen film luzea estreinatu zuen, ‘20.000 erle-espezie’, eta ez edonolako plazan: Berlingo Nazioarteko 23. zinema-jaialdian. Hamar minutuko txalo zaparrada jaso zuen, baita sari potoloa ere, Sofia Otero gaztetxoak Zilarrezko Hartza irabazi baitzuen bere antzezpen bikainagatik. Zinegile arabarra Oier Aranzabalekin solasean aritu da "Basque" podcastean. Lehen atal honetan bere txikitako oroitzapenez, zinemagintzan hasteak dakartzan buruhausteez eta azkura sortzen duen zinemaz, besteak beste.