Abiapuntua

Zenbat buru, hainbat maitasun eredu

Maitatzeko eta maitatuak izateko moduak anitzak dira, hori da “Zenbat buru, hainbat maitasun eredu” atalean ikusiko duguna. Aste honetan, Xabier Madariagak sei gazte bidaliko ditu maitasuna bizitzeko ikuspuntu ezberdinak ezagutzera. Maiderrek eta Ikerrek aniztasun funtzionala duten pertsonek maitasuna nola bizi duten ezagutzeko aukera izango dute Maialen Beristaini eta Lander Ortegari esker. Landerrek eta Maialenek 5 urte daramatzate elkarrekin eta elkarrekin bizitzera joateko asmotan dabiltza. Kalean askotan epaituak sentitzen direla aitortu diete gure gazteei eta, kamera ezkutu baten bitartez, hau frogatzeko aukera izango dute. Bestalde, Mikel eta Magda Irati Agirrezabalarekin egongo dira. Irati 22 urteko azpeitiarra da eta pertsona arromantiko eta asexual gisa identifikatzen da. Maitasuna nola bizi duen ezagutuko dute Magadak eta Mikelek. Azkenik, Borjak eta Jasonek polimaitasunari buruz hitz egingo dute Aitor Nietorekin, 31 urteko markinarrarekin. Egun, Aitorrek bi maitasun erlazio ditu aldi berean. Maitasunaren eta erlazioen inguruan hausnarketa eta lanketa handia egindakoa da. Horrez gain, gure gazteek maitasun mota desberdinei buruz eztabaidatuko dute Aitorrekin eta beste bi bikote monogamikorekin. Programan zehar, haurrek maitasuna nola bizi duten ere jakingo dugu.

Gorputz ez normatiboak

Atal honetan gorputz ez- normatiboak dituzten hainbat pertsonaren errealitatearen berri izango dugu. Xabier Madariagak sei gazte gonbidatuko ditu pertsona hauek jasaten dituzten aurreiritzien eta oztopoen inguruan hausnartzeko. Maria eta Omel, Lara Zapirainekin egongo dira, 29 urteko gazte zarauztarra da eta akondroplasia du. Lararen egunerokotasuna ezagutuko dute; bere etxe egokituan egongo dira, erosketak egiten lagunduko diote eta bere lanera joateko aukera ere izango dute, besteak beste. Jasonek eta Irunek, Aida Garcia ezagutuko dute, 25 urte dituen bilbotarra. Loditasunaren inguruan hausnartzeko aukera izango dute berarekin; izan ere, Aida, bere pisua dela eta, bizitzako hainbat esparrutan epaituta sentitzen da. Hirurek esperimentu bat egingo dute garraio publikoan eta emaitza harrigarria izango da guztientzat. Azkenik, Ari eta Borja, Xabi Osarekin egongo dira, 30 urteko debarrarekin. Xabiri, amaren sabelean zegoela, ez zitzaion ezkerreko besoa ondo garatu eta, ondorioz, ebaki egin behar izan zioten. Hau ez da eragozpen bat izan Crossfitean konpetitzeko eta bere gimnasio propioa edukitzeko: Anboto Crossfit. Gainera, esperimentu baten bitartez, gure sei gazteek beraien larruan biziko dute zer den itxura fisikoagatik epaituta izatea.

Animalien baldintzarik gabeko maitasuna

Aste honetako ¿Animalien baldintzarik gabeko maitasuna¿ atalean Xabier Madariagak sei gazte gonbidatuko ditu animalien erreinuan murgiltzera. Andoni Lejardi eta Ari Alberdi Almike Izagirre eta bere kanitxeekin izango dira. Txakurren edertasun lehiaketen mundua ezagutuko dute eta Almikeren txakurrentzako ile-apaindegia bisitatzeko aukera izango dute. Markel Trecetek eta Mikel Sarrionandiak esperimentu txiki batean parte hartuko dute. Baserriko animaliekin egotera ohituta dauden 7 urteko haurrekin elkartu eta animaliei buruzko galdera batzuk erantzun beharko dituzte. Markelek eta Mikelek galderaren bat asmatzen ote duten ikusiko dugu¿ Ondoren, Bea Ochotorena, Ultzama Baserri Eskolako sortzailea ezagutuko dute. Baserri berezi honetan, abandonatutako 97 baserri-abere baino gehiago erreskatatu dituzte, eta gizarte bazterkeria arriskuan dauden pertsonei ere lana ematen diete bertan. Beste animalia batzuekin ere ikusiko ditugu Markel eta Mikel, katuekin. Ane Zudaire Laukatu Elkarteko kidearekin egongo dira, elkarte honetan kalekatuak zaintzeko eta kalean dauden koloniak kontrolatzeko lanak egiten dituzte. Bestalde, Irune Sorazuk eta Maider Zubiatek animaliek gizakioi zenbateraino lagundu diezaguketen frogatuko dute. Alde batetik, Ane Garcia eta Javier Romero Euskadiko Laguntza Txakurren Taldeko boluntarioekin egongo dira. Hortaz gain, Luka ezagutuko dute, autismoa duen 4 urteko haurra. Denbora darama zaldiekin terapia egiten, ¿ekinoterapia¿, eta Irune eta Maider Oñatiko Pottokalekura joango dira terapia hau ikusteko eta bertatik bertara bizitzeko.

Genero-identitateak deseraiki

Aste honetan, genero-identitateak izango ditugu hizpide. ¿Genero-identitateak desereaiki¿ atalean generoaren pertzepzioa eta adierazpen pertsonala anitza dela ikusiko dugu. Xabier Madariagak sei gazte gonbidatu ditu genero-identitate ezberdinetan sakontzera . Markele Trecetek eta Luda Davidenkok Julen Gorosabel ezagutuko dute, bere burua pertsona trans ez-bitar gisa definitzen duen 27 urteko gazte donostiarra. Markelek eta Ludak bere errealitatea ezagutuko dute eta gizartean ohikoa den bitartasunetik at egoteak dakartzan zailtasunez eta oztopoez hausnartzera eramango ditu. Iker Clavero eta Ari Alberdi gizontasunaz arituko dira Aner Euskitzerekin, 20 urteko zarauztarrarekin. Gizon izateak dakartzan botereaz, pribilegioez eta erabakiez hausnartzeko aukera izango dute. Azkenik, Magda Adamek eta Cristian Osipek Mash Elizalde ezagutuko dute, 23 urteko gizonezko transa, eta Loratuz Lotu elkartearen sortzailea. Elkarte honetan pertsona transen inguruko hitzaldiak eta tailerrak ematen dituzte. Bere trantsizioaz ere arituko dira. Amaitzeko, esperimentu baten bitartez, Magdak eta Cristianek pertsona transek harreman sexu-afektiboak izateko dituzten zailtasun batzuk zein diren jakingo dute.

Berdintasuna: atzerapausorik ez

Aste honetan genero berdintasuna izango dugu ardatz Abiapuntua saioan. ¨Berdintasuna: atzerapausorik ez¨ atalean, Xabier Madariagak sei gazte bidaliko du lan, ardura eta rolen ikuspuntutik errealitate desberdinak ezagutzera. Hasteko, Magda Adamek eta Borja Martinez de Antoñanak Elena Rodriguez ezagutuko dute, 49 urteko zarauztarra, ingeniaria da eta Beasaingo Ingeteam enpresan goi kargua du. Emakume zuzendaria izateak dakartzan oztopo eta zailtasunak azalduko dizkie gazteei. Jason Alonso eta Cristian Osip Anita Alonsorekin egongo dira, 45 urteko emakume soldatzailearekin. Anita, enpresako emakume soldatzaile bakarra da. Gainera, Jasonek eta Cristianek 4 eta 10 urte bitarteko haurrekin esperimentu bat egingo dute. Hainbat ogibiderekin erlazionatutako pertsonaiak marraztea eskatuko dizkiete. Genero estereotipoetan oinarritutako emaitza jasoko ote dute? Bestalde, Ines Woldin eta Aitor Calzada Ispasterrera joan ziren eta bertan, Aritz Erkiaga eta bere familia ezagutu zuten. Aritz, Miamin zestalari profesional gisa urte luzez ibilitakoa da, baina Euskal Herrira itzultzean etxeko gizon izatea da bere lana. Honekin lotuta, esperimentu baten bitartez, kalera irtengo gara euskaldunok zaintza lanak eta etxeko lanak nola banatzen ditugun jakiteko.

Nork bere erara bizitzeko erronka

“Nork bere erara bizitzeko erronka” atalean Xabier Madariagak ohikotasunetik ateratzen diren bizi proiektu ezberdinak ezagutzera bidaliko ditu gure gazteak. Zer da garrantsitzuagoa non bizi ala nola bizi? Hausnarketa sakona egingo dute gure gazteek egokitu zaien errealitatea bizi eta gero. Ari eta Luda Julen Axpe otxandiarrarekin egongo dira. Julenek 27 urte ditu eta 4 urte daramatza furgonetan bizitzen. Arik eta Ludak, hamar metro karratuan nola moldatzen den jakingo dute eta gau bat pasatuko dute bere etxe mugikorrean. Mikel eta Maria Nafarrora joango dira, Vianara. Bertan Igor Aizpurua eta bere familia ezagutuko dute. Laztozko etxe batean bizi dira, ingurumenarekiko errespetuan oinarritutako filosofiarekin. Gainera, etxe alboan duten yurta batean, haurrentzako hezkuntza tradizionalarekiko alternatiba gisa, Hegazti baso eskola sortu dute. 4 Borja eta Markel ere Nafarroan izango dira. Gardalain herri okupa bisitatuko dute eta bertan, Joseba Fernandez ezagutuko dute. Proiektu hau duela 14 urte hasi zuen gazte talde batek eta ordutik, herriaren birpopulazio eta berreraikitze lanetan ari dira. Beste hainbat herritar ere ezagutuko dituzte, auzolanean arituko dira eta okupa mugimenduaren ikuspegia sakonago ezagutzeko aukera izango dute. Saio honetan ere ez da ohiko esperimentua faltako. Atal honetan helduak eta haurrak elkartuko ditugu, beraien bizimoduan garrantzitsuena zer den azal diezaguten. Adinaren arabera erantzunak zeharo ezberdinak direla ikusiko dugu.

Sare sozialak, lagun edo etsai?

Sare sozialek harremanak izateko, komunikatzeko, edukiak partekatzeko eta ligatzeko era berriak ekarri dizkigute. ¨Sare sozialak, erreminta ala arma?¨ atalean, Xabier Madariagak sei gazte bidaliko ditu sare sozialekin harreman ezberdinak dituzten hainbat pertsona ezagutzera. Ari eta Omel Azkoitiara joango dira eta egun bat pasako dute Iban Garcia eduki sortzailearekin. Sare sozialetatik bizitzea eta bertan aritzea dirudien bezain erraza ez dela egiaztatuko dute. Aste honetan oso esperimentu interesgarria egingo dugu. Ligatzeko aplikazio bat bizitza errealera eraman nahi izan dugu. Maria eta Borja izango dira protagonistak eta hainbat gazteren artean gustuko dituztenak aukeratu beharko dituzte. Ikusiko dugu nola sentitzen diren mundu digitala mundu fisikora eramanda, tarteko pantailarik gabe. Honen harira, posible al da maitasuna Interneten aurkitzea? Batzuentzat, bai. Ari eta Borja Asier Errarterekin egongo dira, Elgetako 28 urteko mutilarekin. Berak ligatzeko aplikazioei esker hainbat bikotekide izan ditu. Ligatzeko aplikazioek lagun talde berri bat egiteko ere balio izan diote. Saioan sare sozialen alde iluna ere ezagutuko dugu. Esperimentu bat egingo dugu bost gazterekin: Nola jokatzen dugu sare sozialetan anonimotasunetik jarduten dugunean? Esperimentuan gertatu zenak zur eta lur utziko gaitu. Ildo honetatik, Jasonek eta Cristianek Mei Arregi ezagutuko dute, 22 urteko neska trans donostiarra ciberbullyinga jasan duena.

Azalean bakarrik gara ezberdin

“Pertsona guztiak berdinak gara”. Denok gaude ados baieztapen horrekin, baina askotan gure jarrerek ez dute hori esaten. “Azalean bakarrik gara ezberdin” atalean Xabier Madariagak sei gazte gonbidatuko ditu arrazializatutako pertsona ezberdinen errealitateak bizitzera. Markel eta Magda, Elhadje Fall “Babacar” ezagutuko dute, manta gaineko salmentan aritzen den 29 urteko senegaldarra. Duela 7 urte Europara heldu zen pateran eta egun, Bilbon bizi da. Beste senegaldar batekin ere egongo dira, Tidane Biop 24 urteko taxi-gidariarekin. Magda eta Markelekin batera esperimentu batean parte hartuko du azalaren koloreak zenbateraino baldintzatzen gaituen ikustarazteko. Emaitzak aho bete hortz utziko gaitu. Bestalde, Maiderrek, Cristianek eta Irunek ijioten errealitatea ezagutuko dute. Horretarako, Violeta Perezekin egongo dira, 21 urteko derioztarrarekin. Zuzenbideko ikaslea da Euskal Herriko Unibertsitatean. Horrez gain, beste emakume ijito bat ezagutuko dute: Pilar Garcia “Baby”, Kale Dor Kayiko ijitoen elkarteko gizarte langilea. Violetak eta Babyk gure gazteek egin duten ijitoei buruzko aurreiritzien inguruko kale inkesta aztertuko dute. Azkenik, Irune eta Iker Bilboko San Frantzisko auzoan murgilduko dira. Esther Ogunleyerekin egongo dira, 22 urteko kazetariarekin, etorkizuneko kazetari beltzentzat erreferente bihurtzea helburu du. Berarekin Diversitours proiektua ezagutuko dute: San Frantzisko auzoaren historia sustatzea eta horrekiko dauden aurreiritziak apurtzea helburu duen tour turistikoa. Bestalde, Georges Balingarekin egongo dira, Koop SF 34 proiektuko sortzailearekin. Auzoko migratzaileentzat zuzendutako co-working espazioa eta enpresen mintegia da. Gainera, Magdak eta Markelek esperimentu bat egingo dute 11 urte inguruko haurrekin; elkarrekin ikasten duten haurrekin, baina kultura eta azal-kolore desberdinak dituztenekin.